Eze 12 | NdeIBE | STEP | Ilizwi likaJehova lafika kimi lisithi:

Ezekiel 12

Ukuthunjwa Kuyafanekiswa

1 Ilizwi likaJehova lafika kimi lisithi:

2 “Ndodana yomuntu, uhlala phakathi kwabantu abahlamukayo. Balamehlo ukuba babone kodwa kababoni, njalo balendlebe ukuba bezwe kodwa kabezwa, ngoba bangabantu abahlamukayo.

3 “Ngakho-ke ndodana yomuntu, lungisa izimpahla zakho zasekuthunjweni njalo kuthi emini, bekhangele, uphume usuke lapho okhona uye kwenye indawo. Mhlawumbe bazazwisisa, lanxa beyindlu ehlamukayo.

4 Ngezikhathi zemini, bekhangele, khuphela izimpahla zakho phandle zilungiselwe ukuya ekuthunjweni. Kuthi kusihlwa, bekhangele, uphume njengabaya ekuthunjweni.

5 Bekhangele, bhoboza umduli ukhuphele izimpahla zakho ngaphandle kwawo.

6 Zetshathe ehlombe bekhangele uhambe lazo kusihlwa. Mboza ubuso bakho ukuze ilizwe ungaliboni, ngoba sengikwenze waba luphawu endlini ka-Israyeli.”

7 Ngakho ngenza njengokulaywa kwami. Ngezikhathi zemini ngakhupha izimpahla zami zilungiselwe ukuya ekuthunjweni. Kusihlwa ngabhoboza umduli ngezandla zami. Izimpahla zami ngazikhuphela ngaphandle kuhwalala, ngizetshethe emahlombe ami bekhangele.

8 Ekuseni ilizwi likaJehova lafika kimi lisithi:

9 “Ndodana yomuntu, indlu leyana ehlamukayo yako-Israyeli kayikubuzanga na yathi, ‘Wenzani na?’

10 “Wothi kubo, ‘Nanku okutshiwo nguJehova Wobukhosi: Izilo leli limayelana lenkosana eJerusalema kanye lendlu yonke ka-Israyeli ekhonale.’ 11 Wothi kubo, ‘Ngiluphawu kini.’ “Njengoba ngenzile, kuzakwenziwa kanjalo kubo. Bazakuya ekuthunjweni beyizigqili.

12 “Oyinkosana phakathi kwabo uzakwetshatha izimpahla zakhe kuhwalala asuke, njalo imbobo izakwenziwa emdulini ukuba aphume ngayo. Uzamboza ubuso bakhe ukuze ilizwe angaliboni. 13 Ngizamendlalela imbule lami, njalo uzabanjwa yisithiyo sami; ngizamusa eBhabhiloniya ilizwe lamaKhaledi, kodwa kasoze alibone, njalo uzafela khona.

14 Ngizabahlakazela emimoyeni bonke labo abamhanqileyo – izisebenzi zakhe kanye lamabutho akhe wonke – njalo ngizaxotshana labo ngiphethe inkemba.

15 “Bazakwazi ukuthi nginguJehova lapho sengibachithachithela phakathi kwezizwe njalo ngibahlakazela emazweni. 16 Kodwa ngizaphephisa abalutshwana babo ekuhlaselweni yinkemba, indlala kanye lesifo, ukuze kuthi ezizweni abaya kuzo bazivume zonke izenzo zabo ezinengayo. Lapho-ke bazakwazi ukuthi nginguJehova.”

17 Ilizwi likaJehova lafika kimi lisithi:

18 “Ndodana yomuntu, qhaqhazela nxa unatha amanzi akho. 19 Yitsho ebantwini belizwe uthi: ‘Nanku okutshiwo nguJehova Wobukhosi mayelana lalabo abahlala eJerusalema kanye laselizweni lako-Israyeli: Bazakudla ukudla kwabo benqineka banathe lamanzi abo bengelathemba, ngoba ilizwe lizaphundlwa konke okukulo ngenxa yodlakela lwabo bonke abahlala khona. 20 Amadolobho okuhlalwa kuwo azaqothulwa ilizwe lichitheke. Lapho-ke bazakwazi ukuthi nginguJehova.’ ”

21 Ilizwi likaJehova lafika kimi lisithi:

22 “Ndodana yomuntu, yisaga bani lesi na elilaso elizweni lako-Israyeli esithi: ‘Izinsuku ziyedlula njalo imibono yonke iba yize’? 23 Wothi kubo, ‘Nanku okutshiwo nguJehova Wobukhosi: Ngizasiqeda isaga lesi, njalo kabayikusitsho futhi ko-Israyeli.’ Wothi kubo, ‘Izinsuku sezisondele lapho imibono yonke izagcwaliseka khona. 24 Ngoba akusayikuba lemibono yamanga futhi kumbe ubungoma benkohliso ko-Israyeli.

25 Kodwa mina Jehova ngizakhuluma engikufunayo, njalo kuzagcwaliseka ngokuphangisa. Ngoba ezinsukwini zakho, wena ndlu ehlamukayo ngizagcwalisa loba kuyini engikutshoyo, kutsho uJehova Wobukhosi.’ ”

26 Ilizwi likaJehova lafika kimi lisithi:

27 “Ndodana yomuntu, indlu ka-Israyeli ithi, ‘Umbono awubonayo ngoweminyaka eminengi kusukela khathesi, njalo uphrofetha ngesikhathi esizayo esikhatshana kakhulu.’

28 “Ngakho wothi kubo, ‘Nanku okutshiwo nguJehova Wobukhosi: Akukho lalinye lamazwi ami elizaphuziswa; loba kuyini engikutshoyo kuzagcwaliseka, kutsho uJehova Wobukhosi.’ ”